TUMATAYOG, LUMALAWAK ANG MGA BILDING AT RESORT

12.3.2004

Habang naninila ang mga turista,

negosyanteng Amerkano,

Hapones, Aleman,

luwa-matang nananagpang

bg abubot

at tanawing katutubo

bukod pa sa likas na yaman ng bayan,

may tulirong inang nag-alok ng sanggol,

ng sariling sanggol,

sa Ermita, dahil ayaw

na ang kanyang bunso’y dilat na tupukin

ng apoy ng lagnat.

At nagtatayugan, nangagsisilawak

ang commercial complex, ang hotel at resort

ang convention center.

Palotsinang kahon, kalawanging pala na sinunungsunong

ay tumapon

nang ang sintusinto’y tumpok ng basahan,

tumpok ng basahang

masagasa

ng itim na kotse sa Welcome Rotunda;

samantala, sa Batasan

ay nagbabangayan sa piling pusisyon

ang sandakot

na de-susing pulitiko.

At nagtatayugan, nangagsisilawak

ang commercial complex, ang hotel at resort,

ang convention center.

Sa Constitution Hill—kapirasong lungaw

na pinagtapunan

sa nakararaming ayaw bigyang-puwang sa bayang sarili,

tambakang ang laging nangagbabangkete’t

nabubundat

at ang mauugong na bangaw at langaw—

may gusgusing ingkong,

lupagi sa lupang sahig-barumbarong,

na nakitang

ngumangatngat nang tulala

sa bituka’y atay ng bangkay ng apong namatay sa gutom.

At nagtatayugan, nangagsisilawak

ang commercial complex, ang hotel at resort,

ang convention center.

Pinatalsik

ng poong-maylupa sa sukarera,

o tulad ng kapwa dustang magbubukid

ay kinulimbatan ng tahana’t lupa

ng isang higanteng dayong korporasyon;

katutuntong lamang sa lubak ng lunsod

magbuhat sa dawag ng iniwang baryo;

walang ipakai’t makain ay wala,

isang ama ang naghampas

ng ulo ng anak sa pader ng Recto

habang hawakhawak ang dalawang paa.

At nagtatayugan, nangagsisilawak

ang commercial complex, ang hotel at resort,

ang convention center.

Sa liyab ng sunog sa isang pabrika sa South Diversion Road,

mga manggagawa’y pilit kinapkapan

bago palabasin;

maraming nagasak;

maraming nasawi, tigmak pa ng pawis,

nang mangagsitalon mula sa mataas na mga palapag,

at ang inilimos ng kapitalista—

ng kapitalistang ayon sa dekreto’y bawal pagwelgahan—

ay hindi pa maibili ng abang kabaong.

At nagtatayugan, nangagsisilawak

ang commercial complex, ang hotel at resort,

ang convention center.

1978

Posted at 3.12.04 by itimatputi


	darz09 August 12, 2009 08:41 PM PDT kawa2 nman ang mga taong inalipin at inalisan ng karapatang pangtao....san ba ito nangyari???sa pilipinas ba ito???pilipino ba ang mga kinawa2 d2????


	Claire December 9, 2008 07:14 PM PST Mayroon kami niyan sa libro...... mayroon ngang pinapasagot sa amin eh.... kaya pumunta ako d2 hehehe!!!!!!


	mau June 18, 2008 02:01 PM PDT san libro ba toh mhahanap?


	moki February 5, 2008 07:09 PM PST may nkpgrevw nb nito?

Leave a Comment:

Home

POEMS
AND
TRANSLATIONS
OF
ROMULO A. SANDOVAL
26 Hulyo 1950 -
8 Pebrero 1997

Makata ng Taon sa Talaang Ginto noong 1975, si Romulo A. Sandoval ay isa sa mga modernistang tinig ng mga anakpawis. Dalawang beses siyang nagwagi sa tula sa Don Carlos Palanca Memorial Awards for Literature-- pangatlong gantimpala noong 1977 at unang gantimpala noong 1981. Pangahas sa wika at imahen, progresibo't makabayan sa diwa at gawa, si Mulong ay isang tunay na rebolusyonaryong makata.

Siya'y tubong Bauan, Batangas.

Ang ilan sa mga tula sa koleksyong ito na inilathala ng SIPAT PUBLICATIONS at SINING SA KOMUNIKASYON, ADBERTAYSING AT PABLISING (SIKAP) ay nalathala sa mga sumusunod na publikasyon: Kamao, The Diliman Review, Galian, The Literary Apprentice, The Philippine Collegian, Talaang Ginto sa Tula at Walong Dekada ng Makabagong Tulang Pilipino.

Ang mga sumusunod na tula ay ginawan ng maliliit o di kaya'y mayor na rebisyon: "Abo ng Ulilang Tala, Liyab ng Angaw na Piko at Lingkaw;" "Apatnaraang Matadero;" "Araw-araw, Nagpipyesta ang mga Langaw;" "Byahe;" "Ang Kanilang mga Karapatan;" "Ang mga Kriminal;" "Ang Daming Mabibili sa Piso Ngayon;" "Darating ang Papa;" "Ang Ebanghelyo Sang-ayon Kay San Fermin, Propetang Tagatrumpeta ng Maiinam na Balita;" "E Ano Ngayon?;" "Gabi, sa Isang Kapihan;" "Harana;" "Lamay;" "Pagkat Tayo'y Nagmamahal;" "Sampunit na Langit;" "Tumatayog, Lumalawak ang mga Bilding at Resort." Ang mga petsa sa hiluhan ng mga tula ay tumutukoy sa mga pinal na burador o bersyon; hindi naitala o hindi masigurado (petsang may tandang pananong) ana sa iba pa.

TAUSPUSO AT WALANG HANGGANG PASASALAMAT:
> sa Komite: Reuel M. Aguila, Tomas Agulto, Donato M. Alvarez, Flor Caagusan, Danilo A. Consumido, Jesus Manuel Santiago;
> sa mga Kasama sa Kilusan at mga Kapanalig at Kaalyado ng Pambansa-demokratikong Rebolusyong Pilipino;
> sa mga kamag-anak;
> sa mga kaibigang sumusuporta: Monico M. Atienza, Flor Caagusan, Leoncio & Linda Co, George & Mercy Fabros, Mon & Iting Isberto, Sol Juvida, Doming & Edna May Landicho, Bien Lumbera, Elynia Mabanglo, Tet Maceda, Jo-Ann Maglipon & Ding Marcelo, Bobbie Malay & Satur Ocampo, Dick Malay, P.T. Martin, Nanette Matilac, Mario Miclat, Elmer & Tita Ordonez, Carol Pagaduan, Lilia Quindoza, Gil Quito, Aida F. Santos, Judy Taguiwalo, Luis V. Teodoro, Nic Tingson, Del Tolentino, Bobby Tuazon;
> kina Dr. Susan Balingit, Dr. Carmelita C. Canila at Dr. Jesusa M. Carlos;
> kay Fanny, matalik na kaibigan;

> kina June, Jimmy, Gelacio, Tonette, Joe at Nico;

kina Chuck at We, Rita Manuel at Jovy Zarate;

sa GAT at PANULAT.



Message